Kisi ka dard ho dil be-Qaraar apna hai

Kisi ka dard ho  dil be-Qaraar apna hai

Hava kahiN ki ho siinaa figaar apna hai

Ho koi fasl magar zakhm khil hi jate haiN

Sadaa bahaar dil E daGhdaar apna hai

Jo shaad phirte the kal aaj chhup ke rote haiN

Hazaar shukr gham E paaidaar apna hai

Na tang kar dil E mehzuN ko ae gham E duniya

Khudai bhar meN yehi Gham gusaar apna hai

Wo koi apne siwaa ho to us ka shikwa karuN

Judaayii apni hai, aur intezaar apna hai

Jurm E inkaar ki sazaa hi de

Jurm E inkaar ki sazaa hi de

Mere haq meN bhi kuch sunaa hi de

Ishq meN ham nahiN zyaadaa-talab

Jo teraa naaz E kam-nigaahi de

Tu ne taaroN se shab ki maaNg bhari

Mujh ko ek ashk subh-gaahi de

Tu ne banjar zamiN ko phuul diye

Mujh ko ek zakhm dil-kushaa hi de

BastiyoN ko diye haiN tu ne chiraaG

Dasht E dil ko bhii koii raahi de

Umr bhar ki navaa-gari kaa silaa

Ae Khudaa! koii ham-navaa hi de

Zard-roo hain waraq KhyaaloN ke

Ae shab E hijr, kuch siyaahii de

Gar majaal E sukhan nahiN ‘Nasir’

Lab E khaamosh se gavaahi de

Zindagi bhar wafaa hamiN se huii

Zindagi bhar wafaa hamiN se huii

Sach hai yaro khataa hamiN se huii

Dil ne har daagh ko rakha mehfooz

Ye zameeN khushnuma hamiN se huii

Ham se pehle zameen E shehr E wafa

Khaak thi, keemiyaa hamiN se huii

Kaun uThata shab E firaaq ke naaz

Yeh bala aashnaa hamiN se huii

Be-gharaz kaun dil gaNwaata hai

Teri Qeemat adaa hamiN se huii

Sitam E naarawa tujhi se hua

Tere haq mein dua hamiN se huii

Sa’yi – tajdeed E dosti ‘Nasir’

Aaj kya, baarha hamiN se huii