Dard Se Mere Hai Tujhko Beqaraari Haaye Haaye …

Dard se mere hai tujhko beqaraarii haaye haaye

Kyaa hui zaalim teri Ghafalatshi’aari haaye haaye

Tere dil meN gar na thaa aashob-E-Gham kaa hausalaa

Tu ne phir kyun kii thii merii Gham-gusaari haaye haaye

Kyun meri Gham-Khaaragii kaa thujhko aayaa thaa Khyaal

Dushmanii apanii thii merii dost daari haaye haaye

Umr bhar kaa tuune paimaan-E-vafaa baaNdhaa to kyaa

Umr ko bhii to nahiN hai paayadaari haaye haaye

Zahr lagtii hai mujhe aab-O-havaa-E-zindagii

Yaa’nii tujh se thi ise naasaazgaari haaye haaye

Ghulfeshaani haaye naaz-E-jalvaa ko kya ho gaya

Khaak par hoti hai terii laalaakaari haaye haaye

Sharm-E-rusvaayii se jaa chhupnaa naqaab-E-Khaak meN

Khatm hai ulfat kii tujh par pardaadaari haaye haaye

Khaak meN naamuus-E-paimaan-E-muhabbat mil gayii

Uth gayii dunyaa se raah-O-rasm-E-yaari haaye haaye

Haath hi teGh-aazmaa kaa kaam se jaataa rahaa

Dil pe ik lagne naa paayaa zakhm-e-kaari haaye haaye

Kis tarah kaaTe koii shab_haaye taar-E-barshigaal

Hai nazar khun kardaa-E-akhtar-shumaari haaye haaye

Gosh mahjuur-E-payaam-O-chashm mahruum-E-jamaal

Ek dil, tis par ye naa-ummiid-vaari haaye haaye

Ishq ne pakaRa na thaa ‘Ghalib’ abhii vahshat ka rang

Rah gaya thaa dil meN jo kuchh zauq-E-Khaari haaye haaye

Aaiinaa KyuN Na DuN K Tamaashaa KaheN Jise …

Aaiinaa kyuuN na duuN K tamaashaa kaheN jise

Aisaa kahaaN se laauuN K tujhsaa kaheN jise

Hasrat ne laa rakhaa terii bazm-E-Khayaal meN

Guldastaa-E-nigaah suvedaa kahe.n jise

PhuuNkaa hai kisane gosh E muhabbat meN ai Khudaa

Afasuun-E-intazaar E tamannaa kaheN jise

Sar par hujuum-E-dard-E-Ghariibii se Daliye

Vo ek musht-E-Khaak K seharaa kaheN jise

Hai chashm-E-tar meN hasarat-E-diidaar se nihaaN

Shauq-E-inaaN guseKhtaa dariyaa kaheN jise

Darakaar hai shiguftan-E-gul haaye aish ko

Subh-E-bahaar pa.nbaa-E-miinaa kaheN jise

“Ghalib” buraa na maan jo vaaiz buraa kahe

Aisaa bhii koii hai K sab achchhaa kaheN jise

Poochhte HaiN Woh K GHalib Kaun Hai?

Jaur se  baaz aaye  par baaz  aayaiN  kya ?

Kehte haiN, ham tumko muNh dikhlayaiN kya ?

Raat din  gardish  meiN haiN  saat aasmaaN

Ho rahega kuchch-na-kuchch ghabraayaiN kya ?

Laag  ho  to   usko  ham   samjhaiN   lagaav

Jab na ho kuchch bhee, to dhoka khayaiN kya ?

Ho  liye   kyuN   naamaabar  ke  saath-saath ?

Yaar! apne KHat ko ham pahuNchaayaiN kya ?

Mauj-E-KHooN sar se guzar hee kyuN na jaaye

Aastaan-E-yaar    se    uTh   jaayaiN   kya ?

Umr  bhar dekhaa  kiye marne kee raah

Mar gaye par dekhiye dikhlaayaiN kya ?

Poochchte haiN woh K ‘GHalib’ kaun hai ?

Koee  batlaao   K  ham  batlaayaiN  kya 

Dil E Naadaan Tujhe hua Kya Hai …

Dil  E naadaaN  tujhe  huaa  kya  hai

Aakhir  iss  dard  kii  davaa  kya  hai

Hum  haiN  mushtaaQ  aur  woh  bezaar

Yaa  ilaahee  yeh  maajraa  kya  hai

MaiN  bhi  muNh  me  zabaan  rakhta  huN

Kaash poochho  K muddu’aa  kya  hai

Jab  K  thujh  bin  naheeN  koi  maujood

Phir yeh  hangaamaa  ae  Khuda  kya  hai

Yeh  paree  chehra  log  kaise  haiN

Ghamza O  ishwa O  adaa  kya hai

Shikan E zulf E anbareeN  kyuN  hai

Nigah  chashm E  surma  sa  kya  hai

Sabza O gul  kahaaN  se  aaye  haiN

Abr  kyaa  cheez  hai,  havaaa  kya  hai

Hum  ko  un se  wafa  ki  hai  ummeed

Jo  naheeN  jaante  wafa  kya  hai

HaaN  bhala  kar  tera  bhala  hogaa

Aur  darvaesh  kee  sadaa  kya  hai

Jaan  tum  par  nissaar  karta hooN

Main naheeN jaanta du’aa  kya  hai

MaiN  ne  mana  K  kuchh  nahi  ‘Ghalib’

Muft  haath  aaye  to  buraa  kya  hai

Har Ek Baat Pe Kehte Ho Tum K Too Kya Hai

 Har ek baat pe kehte ho tum K ‘too kya hai’ ?

TumheeN kaho K yeh andaaz-e-guftgoo kya hai ?

Na sho’le meiN yeh karishma na barq meiN ye ada

koee bataao K woh shoKH-e-tund_KHoo kya hai ?

Yeh rashk hai ki wo hota hai ham_suKHan tumse

Wagarna KHauf-e-bad_aamozi-e-adoo kya hai ?

Chipak raha hai badan par lahoo se pairaahan

Hamaaree jeb ko ab haajat-e-rafoo kya hai ?

Jalaa hai jism jahaaN dil bhee jal gaya hoga

kuredate ho jo ab raakh, justjoo kya hai ?

RagoN meiN dauRte phirne ke ham naheeN qaayal

Jab aaNkh hi se na Tapka to phir lahoo kya hai ?

Woh cheez jiske liye hamko ho bahisht azeez

Siwaay baada-e-gul_faam-e-mushkaboo kya hai ?

PiyooN sharaab agar KHum bhee dekh looN do chaar

Yeh sheesha-o-qadah-o-kooza-o-suboo kya hai ?

Rahee na taaqat-e-guftaar, aur agar ho bhee

To kis ummeed pe kahiye ke aarzoo kya hai ?

Bana hai shaah ka musaahib, phire hai itraata

Wagarna shahar meiN ‘Ghalib’ kee aabroo kya hai ?

Ye Na Thi Hamari Qismat K Wisal-E-Yar Hota

Ye Na Thi Hamari Qismat K Wisal-E-Yar Hota

Agar Aur Jite Rahte Yahi Intzar Hota

Tere Wade Par Jiye Ham To Ye Jan Jhuth Jana

K Khushi Se Mar Na Jate Agar Aitbar Hota

Teri Nazuki Se Jana K Bandha Tha Ahdboda

Kabhi Tu Na Tor Sakta Agar Ustawar Hota

Koi Mere Dil Se Puche Tere Tir-E-Nimakash Ko

Ye Khalish Kahan Se Hoti Jo Jigar K Par Hota

Ye Kahan Ki Dosti Hai K Bane Hain Dost Naseh

Koi Charasaz Hota, Koi Gamgusar Hota

Rag-E-Sang Se Tapakta Wo Lahu K Phir Na Thamta

Jise Gam Samajh Rahe Ho Ye Agar Sharar Hota

Gam Agarche Jangusil Hai, Pe Kahan Bachen K Dil Hai

Gam-E-Ishq Gar Na Hota, Gam-E-Rozgar Hota

Kahun Kis Se Main K Kya Hai, Shab-E-Gam Buri Bala Hai

Mujhe Kya Bura Tha Marna Agar Ek Bar Hota

Hue Mar K Ham Jo Ruswa, Hue Kyon Na Garq-E-Dariya

Na Kabhi Janaza Uthta, Na Kahin Mazar Hota

Use Kiun Dekh Sakta Ki Yagana Hai Wo Yakta

Jo Dui Ki Bu Bhi Hoti To Kahin Do Char Hota

Ye Masail-E-Tasawuf, Ye Tera Bayan ‘Ghalib’

Tujhe Ham Wali Samajhte, Jo Na Badkhwar Hota